सन्तापको धून कथासङग्रहमा अभिघात

Abstract

प्रस्तुत अनुसन्धानमूलक लेख सन्तापको धून कथासङग्रहको विश्लेषणमा केन्द्रित रहेको छ । प्रस्तुत कथासङग्रह अशोक थापाले लेखेका तेह«वटा कथाहरूको सङग्रहका रूपमा रहेको छ । प्रस्तुत सङग्रहभित्रका कथाहरूमा शारीरिक वा मानसिक रूपमा पीडाबोध गर्ने पात्रहरूका शारीरिक र मानसिक दसाको अभिव्यक्ति पाइन्छ । यस किसिमका विषयलाई साहित्य समालोचनाअन्तर्गत उत्तरआधुनिक समालोचनाको अभिघात सिद्धान्तअन्तर्गत अध्ययन गरिने हुँदा कथासङग्रहमा समाविष्ट कथाहरूलाई सोही सिद्धान्तका सापेक्षमा अध्ययन गरिएको छ । जीवनमा आर्थिक, लैङ्गिक, जातीय, शारीरिक संरचना, दुर्घटना, यौन, अनाथ, विश्वासघात, मानवीय स्वार्थ, द्वन्द्व, दीर्घरोग, शोषण जस्ता विषयको केन्द्रियतामा आधारित रहेका प्रस्तुत सङग्रहका अधिकांश कथाहरूमा अभिघातजन्य अवस्थाको प्रस्तुति पाइन्छ । सङग्रहको नाम सन्तापको धूनले पनि त्यस कुराप्रति सङ्केत गरेको देखिन्छ । अतः सन्तापको धून कथासङग्रहमा समाविष्ट कथाहरूमा अभिघातजन्य अवस्थाको कस्तो प्रस्तुति पाइन्छ ? भन्ने मुख्य समस्यामूलक प्रश्नमा केन्द्रित रहेर प्रस्तुत सङग्रहका कथाहरूलाई अभिघात सिद्धान्तका सापेक्षमा विश्लेषण गरी यस दृष्टिकोणले प्रस्तुत सङग्रहका कथाहरू महत्त्वपूर्ण रहेको निष्कर्ष निरूपण गरिएको छ ।