मेचे जातिको परिचयात्मक अध्ययन {An Introductory Study of the Meche Caste}

Abstract

नेपालमा बसोवास गर्ने अल्पसङ्ख्यक लोपोन्मुख समुदायअन्तर्गत पर्ने आदिवासी जनजातिका रूपमा मेचे जातिलाई लिइन्छ । मेचे जातिको बसोवास विशेषतः प्रदेश नं १ को झापा जिल्लाका जलथल, भद्रपुर, लखनपुर अनारमुनी, ज्यामिरगढी, बाहुनडाँगी, शनिश्चरे, चकचकी, महेशपुर बनियानीजस्ता विभिन्न गाउँवस्तीहरूमा पाइन्छ । नेपाल बाहिर भारतको आसाम, पश्चिम बंगाल, सिक्किम तथा भुटानका केही क्षेत्रहरूमा पनि यिनीहरू बसोवास गर्दछन् । यिनीहरूका मौलिक सामाजिक, सांस्कृतिक, धार्मिक विशेषता यो आदिवासी जनजातिलाई चिनाउने प्रमुख आधार हुन् । यो लेख मेचे जातिको परिचयात्मक अध्ययनसँग सम्बन्धित छ । विश्लेषणात्मक र विवरणात्मक ढाँचामा आधारित छ । यस लेखमा सङ्ख्यात्मक भन्दा गुणात्मक तथ्याङ्ग प्रयोग गरिएका छन् । प्राथमिक तथा द्वितीयक दुवै प्रकारका तथ्याङ्ग एवम् सूचनाको विश्लेषण गरिएको छ । प्राथमिक तथ्याङ्ग मूलतः झापा जिल्लाको धाइजन, मेचीनगर, बाहुनडाँगी, इटाभट्टा, अनारमनीजस्ता गाउँवस्तीमा बसोवासगर्ने मेचे समुदायबाट सङ्गलन गरिएको हो ।