भालेश्वरदेखि कश्यपेश्वरसम्म धार्मिक पर्यटनको नजरमा काभ्रेपलाञ्चोकका प्रमुख शिवलिङ्गहरु

Abstract

काभ्रेपलाञ्चोक जिल्ला धार्मिक एवम् पौराणिक दृष्टिले पावन भूमि हो । यस आलेखमा काभ्रेपलाञ्चोक जिल्लामा रहेका स्कन्दपुराण वर्णित कश्यपेश्वरदेखि चण्डेश्वर,विकटेश्वर, धनेश्वर, इन्द्रेश्वर र भालेश्वरसम्मका प्रमुख ६ ओटा शिवलिङ्ग र शिवपीठको पौराणिक सन्दर्भ, वर्तमान अवस्थिति र धार्मिक पर्यटनको सम्भावनालाई केलाउने प्रयास गरिएको छ । यसका साथै उल्लिखित शिवपीठमा वर्षभरिमा लाग्ने प्रमुख मेला, पर्व, जात्रा उल्लेख गरी धार्मिक पर्यटनको पदमार्ग पहिचान गर्ने प्रयत्न गरिएको छ । यसका निमित्त गुणात्मक अध्ययन विधिलाई उपयोगमा ल्याइएको छ । यो लेख तयार पार्नका लागि आवश्यक तथ्याङ्कहरु प्राथमिक र द्वितीय स्रोतबाट सङ्कलन गरिएको छ । प्राथमिक स्रोतका लागि स्थलगत अवलोकन तथा तत् तत् स्थानका अग्रजहरुसँग सोधपुछ र अन्तर्वार्ता लिइएको छ । द्वितीय स्रोतका रुपमा विभिन्न सन्दर्भपुस्तक, पत्रपत्रिका र डिजिटल सामग्रीको उपयोग गरिएको छ । सङ्कलित तथ्याङ्कहरुलाई विश्लेषण गर्दा काभ्रेपलाञ्चोक जिल्ला धार्मिक र पौराणिक दृष्टिले पावन शिवतीर्थको जिल्ला हो भन्न सकिन्छ । विदेशी पर्यटक र सनातनी हिन्दु धार्मिक पर्यटनको प्रचुर सम्भावना पनि भएकोले धार्मिक पदमार्ग पहिचान गर्नु आवश्यक देखिन्छ । शिवतीर्थ क्षेत्रका शैवमार्गी र अन्य स्थानीय नागरिकहरुलाई शिवधामको प्रचार प्रशार र संरक्षणमा उत्प्रेरित गर्न सके शिवतीर्थको महत्व बृद्धि भई धार्मिक पर्यटनमा टेवा पुग्ने देखिन्छ ।