पंग:या दथुइ ब्वलंगु नेपालभाषा शिक्षा

Abstract

मांया मुलय् च्वनाः सय्‌कीगु भाषा मेकथं सय्‌कीगु भाय्‌सिबें विशिष्ट व आत्मविश्वास बल्लाकी । मांभाय् दुने सम्वन्धित भाषिया सलंस: दँ न्हेवनिसेंया परम्परा, मूल्यमान्यता अले ज्ञान सुलाच्वनी । मध्यकालय् युरोपय् मांभासं हे शिक्षाया लिसें पुर्नजागरणकालय् भर्नाकुलरया व्यवस्था याना: मांभासं ब्वंकेमा:गु वकालत या:गु खनेदु । अमेरिकाया मार्टिन लुथर किंगं शिक्षाया स्तर थकाय्‌त व धर्मया महत्व केनेत मांभासं हे शिक्षा बीमा: धका: ब: ब्यूगु खनेदु । नेपालय्‌ मध्यकालतक थनया शिक्षाया आधार मांभाय् जूगु खँ थीथी अभिलेखय्‌ खनेदु । नेपालसंवत्‌ २८ या औषधविज्ञानयात ध्वाथुइकेत लंकावतार ग्रन्थ अनुवाद जूगु खनेदु । थ्व ल्याखं नं मांभाय्‌या महत्व गुलि दु धैगु सी दु । नेपालभाषाया शिक्षाया प्रारम्भ व विकास जूगु बःचाहाकलं इतिहास कनेगु थुकिया लागा खः। थ्व च्वसु मूलतः अभिलेखीकरणय्‌ जक लिकुनी । थौंतक नेपालभाषा शिक्षया इतिहास साःप हे म्होजक मनुख जक स्यू । थ्व सम्बन्धित मनूतय्‌त कनेफःसा नेपालभाषाया शिक्षाय्‌ ध्यान तैपिन्त बल्लाःगु बौद्धिक नसा जुइ । थुकिया ज्वलं मुंकेत पुलांपि विभागीय प्रमुख, अभियन्ता व प्रशासकीय पदाधिकारीलिसे कँल्हाबल्हा यानाः मुंकागु दु । थः नं विभागीय प्रमुख जूगुलिं माःमाःथाय्‌ थम्हं स्यूगु खँ तनाबियागु दु । थन अभिलेख जक तय्‌गु जूगुलिं विश्लेषण खास जूगु मदु । तर उकिया सत्यापन जूगु दु । थुकिया उपलब्धिकथं नेपालभाषाया विकास व विस्तारय् इलय् व्यलय् पंगः थनेगु ज्या व उकियात कया: जनस्तरं प्रतिरोध या:गु घटनाय्‌ आधारित जुया: अध्ययन जूगु दु । राज्यं भाषाय् पंग: थंगुया विरुद्ध थीथीकथंया ज्याखँ मा:हनाः हे उच्चशिक्षा तक नेपालभाषां ब्वने दैगु व्यवस्था जूगु ख: धैगु खँ क्वःछी फु ।