सर्गः सिबे नं धरती नमिंग्वाः

Abstract

थ्व लेखय्‌ जनकवि दुर्गालाल श्रेष्ठया मेमुना सफू सर्गः सिबे नं धरती नमिंग्वाः यात सामाजिक यथार्थवाद कथं विश्लेषण यानागु दु । थ्व सफूती ने. सं. १०७४ निसे १०८८ तकया मे दुथ्या:गु दु । पञ्चायतकालीन सामन्तवादी राज्य व्यवस्थाया कारणं ब्वलंगु भाषिक विभेद, दमन, असमान आर्थिक वितरणया कारणं दुनंदुनं ब्वलंगु विद्रोहया वातावरणय् थ्व कविता सृजना जूगु खनेदु । व सफुती दुथ्याःगु कविता सामाजिक यथार्थवादलिसे गुलि स्वापू दु दुवालेगु व उबलेया भाषिक आन्दोलनय् गुकथं लिच्वः लाकेफत दुवालेगु थ्व च्वसुया उद्देश्य खः । थ्व अध्ययनयात
माःगु ज्वलं पुस्तकालय दुनं कयागु दु । कृतिया माध्यमं कविजुं नेपालभाषाप्रति जूगु विभेदया विरुद्ध विद्रोहया सः गथे खः अथे हे चित्रण याना केनादिव यथार्थवादया चिं खः । थ्व कृतिया
लिधंसाय् मेंकविता सामाजिक अनुभव व सामूहिक लुमन्तिया बांलागु अभिलेख ज्वीफु धैगु प्रस्त जु । कवि दुर्गालालजुया कृति सामाजिक यथार्थवादं प्रभावित धाय्‌छिं । अले भाषिक आन्दोलनया खेलय् न्हेज्याःगु खने दु । अध्ययनं वय्‌कःया कविता नेवाःतय्‌गु प्रतिरोध साहित्यया मू ब्वकथं प्रमाणित याः ।