झीगु मे सफुती प्रगतिवादी चेतना

Abstract

झीगु मे सफुती मुक्कं २५ पु मे दुथ्याः । सफुती च्वमि व लय् चिनामिया नां च्वयातःगु मदु । छगू हे विषयवस्तुइ केन्द्रित छन्दात्मक, लयात्मक व गेयात्मक कविता हे मे खः । नेपालभाषाय् मेया विकास लेखनकलालिसें हे जूगु खनेदु । दकले पुलांगु मे प्राण मल्लया इलय् च्वःगु‘वलंगत सिमुले’ खनेदु । नेपालभाषाय् भजन, मतिना, देशवर्णना, राजवर्णना, श्रृंगारिक, वैचारिक आदि मे दु । मार्क्सवादी दर्शनं अभिप्रेरित जूसा प्रगतिवादी मे जुइ । वर्गीय समाजय् वर्गसंघर्षं शोषणरहित समाज स्थापना जुइगु मार्क्सवादी दर्शनया मान्यता खः। मार्क्सवादया थ्व हे मान्यताया साहित्यिक अवतरण हे प्रगतिवाद खः । सफुती दुथ्याःगु मे सामाजिक शोषण, नारी समस्या, राष्ट्रवादी भावना, सौन्दर्यशास्त्र, वर्गसंघर्ष, शोषण विरुद्ध प्रतिकार,भाषिक समस्यायात बःकयाः प्रगतिवादी सैद्धान्तिक दृष्टिकोणं दुवालातःगु दु । पुस्तकालयया ज्वलं स्रोतकथं छेलातःगु दु । थ्व मेय् मुक्तिया नितिं संघर्ष याय्‌माःगु खँय् बः बियातःगु दु । संघर्षं हे भविष्य उज्ज्वल जुइगु ‘झीगु मे’ सफुया लिच्वः खनेदु ।