भूषणप्रसाद श्रेष्ठया छन्द १०१ व नेवाः गजलय् गुण व दोष {Chhanda of Bhusan prasad shrestha and merit and demerit in Newa Gajal}

Abstract

नेपालभाषा काव्य विधाय् स्यल्लाःम्ह गजल च्वमि भूषणप्रसाद श्रेष्ठं शास्त्रीय छन्द व बहरय् गजल चिनातःगु प्यंगू गजल सफू दु । उकी मध्ये ‘छन्द १०१ व नेवाः गजल’ सफूया गजलया बारे थन चर्चा जूगु दु । तर थ्व सफुती च्वंगु गजलया गुण व दोषया बारे आःतक सुनांनं कुलातःगु खनेमदु । थ्व हे गजल सफूया गुण व दोषया खँ कुलेगु थ्व शोधलेखया तातुना खः । थुकिं गजल च्वमिपिंत गजल बारे दुग्यंक अध्ययन याय्त ग्वहालि जुइ । पूर्वीय काव्यशास्त्रय् काव्यगुण व काव्यदोषया बारे थीथी आचार्य विद्वानपिनिपाखें थःथःगु मत व्यक्त यानातःगु दु । थ्व शोधलेखय् ‘छन्द १०१ व नेवाः गजल’ सफुती च्वंगु गजलया गुण व दोषयात पूर्वीय काव्यशास्त्रकथं कुलेगु ज्या जूगु दु । थुकिया लागि पुस्तकालय सामग्रीयात छ्यलाः व्याख्या विश्लेषण यानाः गुणात्मकता विधिकथं यानागु दु । थुगु सफूया गजलय् विम्बया छ्यलाबुला, परिपक्वता, स्पष्टता, कोमलता, प्रतिकात्मकता, गेयात्मकता नापं शास्त्रीय नियम व मान्यताकथं शास्त्रीय छन्द व बहरया प्रयोग यानातःगु खनेदु । थ्व धैगु थुगु सफूया काव्यगुण जुल । तर गुलिंगुलिं गजलया सैद्धान्तिक संरचनाकथं पाय्छि मजूगु, अर्थदोष, पददोष खनेदुगु खँग्वः छ्यलातःगु गजल नं दु । थ्व धैगु काव्यदोष जुल । थुकथं थ्व सफूया गजलय् काव्यदोषसिबे काव्यगुण अप्वः खनेदु । नापं भूषणप्रसादया थुगु सफूया गजल स्वय्बलय् छन्द व बहरया शास्त्रीय मान्यताकथं पाय्छि जुइक चिनातःगु खनेदु ।